24 arestado sa nationwide gun ban

UMABOT na sa 24 katao ang naaresto ng Philippine National Police (PNP) kaugnay sa pagpapatupad ng election gun ban na nagsimula nitong Enero 10.

Batay sa datos ng PNP, kabilang sa mga naaresto ay dalawang security guard at isang miyembro ng Philippine Coast Guard habang mga sibilyan ang iba. Labinlimang baril ang nakompiska.

Samantala, nakompiska rin ang 41 ilegal na gamit tulad ng matatalas at mga bala.

Kalat na sa buong bansa ang 1,736 checkpoints ng PNP mula nang maging epektibo ang gun ban.

Matatandaan,  nagpetisyon ang mga gun ower sa SC kaugnay ng ipinatupad na gun ban para sa eleksiyon na magtatagal hanggang Hunyo 8.

Comelec gun ban, ipinahaharang sa SC

HINILING ng Gun Owners in Action (GO Act) sa Supreme Court (SC) sa pamamagitan ng kanilang presidente na si Eric Acosta, na maglabas ang hukuman ng writ of preliminary mandatory injunction laban sa umiiral na total gun ban.

Ayon sa GO Act, nilalabag ng Comelec gun ban ang Republic Act 10591 o Comprehensive Firearms and Ammunition Act of 2013.

Giit nila, ang may lehitimong banta sa buhay ay kinikilala ng batas para magdala ng armas bilang personal na proteksiyon.

Bagamat sa umiiral na gun ban ay pinapayagang magbitbit ng armas ang presidente, bise presidente, mga mambabatas, miyembro ng gabinete, mga mahistrado, pulis at sundalo, hindi nito sakop ang mga abogadong may maselang kasong hinahawakan at ang mga nasa hanay ng media.

Nagsimula ang patakarang ito ng poll body noong Enero 10, 2016, kasabay ng pagsisimula ng election period.