Politiko may demand letter mula sa NPA

AMINADO ang ilang politiko na nakatanggap na sila ng sulat mula sa New People’s Army (NPA) para paalalahanan na magbayad ng “permit to campaign” (PTC) sa mga lugar na kontrolado ng mga rebelde.

Kinompirma ng tatlong kandidato na tumatakbo sa lokal na posisyon sa Quezon province na nakatanggap na sila ng demand para sa PTC fee.

Ayon sa reelectionist mayor ng Bondoc Peninzula, noong nakaraang buwan pa siya nakatanggap ng sulat mula sa NPA.

“I received my invitation letter last month,” ayon sa reelectionist mayor.

Dinala aniya ng isang barangay official ang sulat ngunit walang nakalagay kung magkano ang babayaran niya sa mga rebelde.

Maging ang mayoralty candidate ng Lamon Bay area ng fourth district ng Quezon ay sinasabing nakatanggap din ng demands sa pamamagitan ng kanyang mobile phone.

Nanawagan si Brig. Gen. Erick Parayno, commander ng 201st Infantry Brigade ng Philippine Army sa Quezon, na huwag ibigay ang demand ng mga NPA.

“The candidates should not be frightened. The rebels are now a weak force. If they give in, the extortion will not stop,” paliwanag ni Parayno.

Sa mga nakaraang halalan, napaulat na bukod sa cash ay humihingi rin ang mga rebelde ng bigas, food stuff, gamot, communication equipment maging cell phone load sa mga kandidato.