Palasyo blanko sa naarestong 3 Pinoy sa Saudi

HINDI pa makompirma ng Malacañang ang napabalitang pagkakaaresto ng tatlong Filipino na sinasabing sangkot sa terorismo sa Saudi Arabia.

Sinabi ni Communications Sec. Sonny Coloma, kailangang maberipika muna ang nasabing report at wala pa silang kompirmasyon.

“Kailangan nating alamin ang correctness or validity of that report. Wala pa tayong kompirmasyon,” ani Coloma.

Magugunitang binitay kamakailan ng Saudi Arabia ang isang prominenteng cleric ng Iran na sangkot sa terorismo.

Ito ang naging mitsa ng tensiyon sa pagitan ng Iran at Saudi Arabia makaraang lusubin ng raliyista ang embahada ng Riyadh sa Tehran.

Pinulong kahapon ni Pangulong Benigno “Noynoy” Aquino III ang mga opisyal sa gabinete para paghandaan ang posibleng paglala ng tensiyon sa Middle East upang matiyak ang kaligtasan ng nasa dalawang milyong Filipino.