Doktor, nurse sinaksak ng injection needle ng ama (Pasyenteng sugatan ‘di agad naasikaso)

DAVAO CITY – Nakatakdang sampahan ng kaso ang isang lalaki na sumaksak sa isang doktor at nurse sa Southern Philippines Medical Center (SPMC) gamit ang injection needle nang hindi agad naasikaso ang kanyang anak na naaksidente.

Kinilala ang suspek na si Jesus Manalo, 41, may asawa, laborer, residente sa Purok 2, Gravahan, Brgy. Matina Crossing sa lungsod.

Sa imbestigasyon ng Buhangin PNP, sinasabing gusto ng suspek na asikasuhin agad ang kanyang 9-anyos anak ngunit may ginagawa pa ang doktor na si Donna Jean Pojol Subaldo, doctor/clerk ng Emergency Room ng Trauma Surgery Department Station, at ang nurse na si Lea Pauya Elica, auxiliary nurse ng ER Section.

Nagalit ang suspek, kinuha sa mesa ang heringgilya at sinaksak sa leeg ang doktor at nurse.

Agad nahuli ng security guard ng ospital si Manalo at dinala sa Buhangin PNP.

Hindi muna nagbigay nang pahayag ang pamunuan ng ospital tungkol sa nasabing insidente.

Samantala, nasa maayos nang kalagayan ang doktor at nurse.