Absuwelto ni PNoy sa SAF 44 draft lang — Ferrer

NILINAW ni Negros Occidental 4th District representative Jeffrey Ferrer, hindi pa pinal ang lumabas na report ng House committee on public order and safety na nagpapahayag na inabsuwelto na si Pangulong Benigno “Noynoy” Aquino III sa Mamasapano massacre na ikinamatay ng 44 kasapi ng Special Action Force (SAF).

Sinabi ni Ferrer, draft pa lamang ang naturang report at hindi pa nalagdaan nang mahigit 50 miyembro ng komite.

Aniya, dapat munang pag-aralan ng bawat miyembro ang dalawang komite sa Kamara na nagsasagawa ng imbestigasyon ang report upang mapagbigay ng kanilang ‘inputs’ at komento para sa pinal na committee report.

Ipinaliwanag niya na matagal nang natapos ang draft ngunit natagalan ang pagsasapinal dahil maraming tinatalakay ang Kamara.

Hindi man inamin ni Ferrer na naabsuwelto si Pangulong Aquino sa naturang draft report ngunit sa kanyang sariling pananaw batay sa kanilang imbestigasyon ay talagang walang kasalanan ang Pangulo sa nangyari dahil malinaw ang instruction sa mga opisyal na humahawak ng operasyon.

Sa kabilang dako, naniniwala si Ferrer na politika ang nasa likod nang muling pagbubukas ng Senado sa imbestigasyon sa Mamasapano, na mismong si Senate Minority Leader Juan Ponce Enrile ang nagsusulong dahil wala siya noong isinagawa ang imbestigasyon.