25 mangingisda sa Surigao kalaboso sa Indonesia

BUTUAN CITY – Kinompirma ng dalawang barangay chairman ng Surigao City na umabot sa 25 mangingisda ang nakakulong ngayon sa Indonesia dahil sa illegal fishing.

Ayon kay Kapitan Josselyn Mantilla ng Brgy. Sabang, 15 sa nasabing bilang ay kanyang constituents habang ang 10 ay taga-Brgy. San Juan base na rin sa pagkompirma ni Brgy. Chairman Monina Caluna.

Sa salaysay ni Mantilla, ang nasabing mga mangingisda ay sakay ng MB RGJ Fishing vessel na umalis sa Surigao City noon pang Nobyembre 25 (2015) pero naaresto noong Disyembre 7 (2015) ng nagpatrolyang Coast Guard ng Sorong City, West Papua province sa nasabing bansa.

Kinilala ng Maritime Industry Authority (MARINA-Caraga) ang operator ng fishing vessel na si Gemma Navarro, residente ng Brgy. Togbongon.

Wala anilang naipakitang permit sa pangingisda sa karagatang sakop ng Indonesia ang mga Filipino at wala rin travel document.

Nakadetine ngayon sa Ministry of Marine Affairs and Fisheries sa Sorong ang mga mangingisdang sina Rodrigo Puno, kapitan ng sinakyang bangka; Jarewel Perjesa, machinist; at crew members na sina Cristobal Ilagan, Romeo Edradan, Edgar Gecozo, Ronald Buniel, Richard Cabero, Ruel Astronomo, Junnie Calundre, Joseph Calundre, Teresito Macabasag, Ronel Escultor, Roel Cabating, Alan Gucela, Jaime Govalanie, Homer Etac, Mansueto Abrao, Teodoro Dayagro Jr., Rolly Cabating, Rolando Bornea, Leopoldo Dadivas Jr., Efren Escultor, Nelson Arsaga, Jose Perjes at Max Gucela.

Patuloy na nagsasagawa ng koordinasyon ang Bureau of Fisheries and Aquatic Resources (BFAR-Caraga), PNP Maritime-13, Philippine Coast Guard at MARINA kaugnay ng nasabing report.