12 sugatan sa salpukan ng 2 DLTB sa Quezon

NAGA CITY – Sugatang isinugod sa ospital ang 12 pasahero makaraang magsalpukan ang dalawang bus sa Sariaya, Que-zon, 12:30 a.m. kahapon.

Ayon kay PO3 Andrew Radones, imbestigador ng Sariaya Municipal Police Station, naganap ang insidente nang mag-overtake ang bus mula sa Manila sa kapwa DLTB bus mula sa Bicol.

Nagkabasag-basag ang mga salamin ng unahang bahagi ng bus habang basag din ang mga salamin sa kanang bahagi ng isa pa.

Ani Radones, siyam katao sa unang behikulo ang sugatan habang tatlo sa isa pang bus.

Ginagamot na ang mga biktima sa ospital habang nasa proseso na rin ng pagbibigay ayuda ang kompanya ng bus.

Napag-alaman, nai-release na ang mga driver na sina Antonio Matias at Arman Vasquez dahil walang nagsampa ng reklamo sa mga pasaherong naospital.