School service naipit sa 2 truck, 2 sugatan

SUGATAN ang dalawang estudyante ng St. Theresa’s College sa Quezon City nang maipit ang kanilang school service sa dalawang truck nitong Miyerkoles ng umaga.

Papasok sa eskuwelahan ang mga bata nang biglang banggain ng isang trailer truck sa likod ang kanilang school service sa Mindanao Avenue.

Kuwento ni Eduardo Danao, service driver, nakahinto sila dahil traffic ngunit bigla silang sinalpok ng isang humaharurot na trailer truck (XSK 167).

Sa lakas ng pagsalpok, bumangga pa ulit ang school service sa dump truck sa harapan ng school service.

Naipit ang paa ng 8-anyos mag-aaral na nakaupo sa harap ng service, at nasugatan din ang isa pang 11-anyos estudyante.

Isinugod ang mga biktima sa Global Hospital. Pinalad na hindi nasugatan ang isa pang estudyante at ang konduktor ng service.

Depensa ng driver ng trailer truck na si Romeo Daz, pababa ang daan kaya sila bumulusok.

Hindi aniya mabilis ang patakbo niya at hindi rin siya nawalan ng preno.

Ayon kay Quezon City Traffic Sector 6 field investigator na si Christian Mendieta, mahaharap si Daz sa reckless imprudence resulting in damage to property and multiple physical injuries.