Doble dadalo sa traslacion ng Itim na Nazareno

INAASAHANG dodoble sa bilang noong nakaraang taon ang mga deboto at turista na dadalo sa parada ng Itim na Nazareno dahil nataon ito sa araw ng Sabado.

Sinabi ni Metropolitan Manila Development Authority (MMDA) traffic discipline head Crisanto Saruca, napaghandaan na nila ang nasabing bilang dahil magtatalaga na rin ng karagdagang mga personnel ang PNP at AFP para makontrol ang dami ng tao.

Nagpulong na rin ang MMDA at Manila District Traffic Enforcement (MDTEU) para mabigyan ng seguridad ang mga dadalo sa prusisyon na magsisimula sa Minor Basilica ng Black Nazarene sa Quiapo, Manila.

Inaasahang aabutin ng 14-16 oras ang parada na gaganapin sa busy commercial street ng lungsod.

Kinausap na rin nila ang ilang street vendors sa daraanan ng prusisyon ng Itim na Nazareno para hindi na sila maging sagabal sa daraanan ng mga deboto.

Sinabi pa ni Saruca, inaasahan na nila ang matinding bagal ng mga sasakyan dahil sa pagsara ng ilang mga kalsada na magsisimula ngayong araw hanggang Sabado.