P.1-M reward vs shooting suspect

MAGKAKALOOB ng P100,000 pabuya si Makati City Mayor Romulo ‘Kid’ Peña sa sino mang makapagtuturo sa pinaghahanap na barangay tanod na si Raymundo Liza.

Si Liza ang bumaril at nakapatay sa 7-anyos na si Mark Angelo “Macmac” Diego at kay Edward Pascual.

Sinabi ng alkalde, pag-uusapan pa lamang ng pamahalaan ang pinal na halaga ng pabuya, ngunit sa ngayon aniya ay P100,000 ang kanyang iaalok.

May mga impormasyon aniya silang natanggap na nasa Makati ang suspek, gayonman, may mga nagsasabing nakalayo.

Inaalam na rin aniya nila kung aktibo pa ang suspek sa barangay o suspendido o nadismis na. 

Inaaalim din kung lisensiyado ang kalibre .45 baril na ginamit ng suspek sa pamamaril. 

Pagtitiyak ni Peña, bagama’t Taguig ang may hurisdiksyon sa kaso, nakahanda silang tumulong para sa ikadarakip ng suspek.

Samantala, nakatakdang sampahan ng Philippine National Police-Taguig ng dalawang bilang ng murder si Liza.

Ayon kay Taguig chief of police, Senior Superintendent Arthur Felix Asis, hinihintay na lamang nila ang death certificate ng mga namatay upang maisampa ang reklamo.

Kahapon ang self-imposed deadline ng pulis para maaresto ang suspek.

Sa ngayon ay tatlong lugar ang sentro ng manhunt.

Nakikipag-ugnayan na rin ang Taguig-PNP sa South Cotabato-PNP dahil taga-Polomolok ang suspek.