Kaso ni Poe, EDCA prayoridad ng SC

MAGIGING abala ang Korte Suprema sa pagpasok ng kanilang trabaho ngayong 2016 para tutukan ang malalaking kaso na nakabinbin sa hukuman.

Sa Enero 7 at 8, pangungunahan ni Chief Justice Maria Lourdes Sereno, bilang chairperson ng Judicial and Bar Council, ang pagsasagawa ng public interviews sa 16 kandidato para maging mahistrado ng Korte Suprema bilang kapalit ni outgoing Associate Justice Martin Villarama Jr., na magreretiro sa Enero 16.

Sa Enero 12, inaasahang tatalakayin ng en banc ang isyu kaugnay ng Philippines-United States Enhanced Defense Cooperation Agreement (EDCA).

Habang sa Enero 19 ay nakatakda ang oral arguments kaugnay ng disqualification cases na inihain laban kay Sen. Grace Poe.