7 arestado sa drug raid sa Sultan Kudarat

KORONADAL CITY- Arestado ang pitong katao sa isinagawang ‘one time big time’ drug raid sa probinsya ng Sultan Kudarat kahapon ng madaling araw.

Inihayag ni Sultan Kudarat Police Provincial Information Officer, Supt. Renante Cabico, sabay isinagawa ang naturang drug raid na nag-umpisa dakong 3 a.m. sa tatlong lugar sa Sultan Kudarat na kinabibilangan ng Tacurong City, Lambayong at Isulan.

Sa nasabing pagsalakay ay nadakip ang pitong suspek at nakuha mula sa kanila ang iba’t ibang klase ng baril, maraming sachet ng shabu, pinakamarami ay galing sa bayan ng Isulan na umabot sa 21 sachet, iba’t ibang drug paraphernalia at manufacturing tool sa paggawa ng baril.

Ayon sa opisyal, matagal nang minamanmanan ang mga suspek dahil nasa drug watch list ang pangalan nila.