INC global na ngayon (Dahil sa pakikiisa ng mga kapatid sa Pangasiwaan)

ANG Iglesiang umusbong sa Filipinas noong 1914, yakap na ng mundo ngayon.

Ganito ang pagsasalarawan ng tagapagsalita ng Iglesia ni Cristo (INC) na si Edwil Zabala kasabay ng pagbubunyag nitong Martes na umaabot na sa 64 kapilya sa ibayong dagat ang napasinayaan sa ilalim ng panunungkulan ni INC Executive Minister Eduardo V. Manalo dahil sa suporta ng mga miyembro ng Iglesia mula sa mahigit 100 bansa.

“Mula nang manungkulan si Ka Eduardo bilang pinuno ng Iglesia noong Setyembre 2009, 64 kapilya na ang naitatag sa 12 bansang nasa apat na kontinente – kumbaga’y isang kapilya sa bawat buwan ng kanyang paninilbihan bilang Executive Minister,” ayon kay Zabala.

“Sa Estados Unidos pa lamang, tatlumpo’t pitong kapilya ang naipatayo. Para sa Iglesia, simula lamang ito,” dagdag ng ministro.  

Mula Setyembre 2009, isa-isang umusbong ang mga kapilya sa Australia, Canada, Denmark, Germany, Greece, Malaysia, The Netherlands, Japan, South Korea, Spain, The United Kingdom, at America.

Ilang buwan lamang mula ngayon, walong kapilya sa Canada, Japan at Estados Unidos ang nakatakdang ihandog at pasisinayaan kabilang ang mga bagong bahay-pagsamba sa Bakersfield, California; Lubbock, Texas; Jersey City, New Jersey; Orange Park, Florida; Corona, Southern California; High Point, North Carolina; Regina, Canada; at Ibaraki, Japan.

Ayon kay Zabala, ang INC ngayon ang isa sa pinakamabilis ang paglago sa mga denominasyong pangrelihiyon sa mundo bunsod ng suporta ng mga distrito ng Iglesia sa Estados Unidos at iba pang mga bansa “kung saan patuloy ang buong-lugod na pagtulong ng mga Kapatid sa layunin ng INC sa pagpapalaganap ng pananampalataya.”

“Masaya kami at may pagpapasalamat, hindi lang bilang mga kaanib sa Iglesia kundi bilang mamamayan ng iba’t ibang bansang aming pinagmumulan. Saksi kami sa dami ng mga lahing nagmumula sa iba-ibang estado ng buhay na maliban sa niyayapos ang aming pananampalatayang Kristiyano ay ipinagdiriwang ito sa iisang wika: ang  Kristiyanong pag-ibig.”

Ayon kay Zabala, ang mga “pagsamba” na isinasagawa sa ibang bansa ay pareho sa paraang nakasanayan ng maraming mga kaanib sa Iglesia dito sa Filipinas, ngunit sa lokal na wika ng mga nakikinig.

“Kinakailangang matutunan ng mga ministrong hindi Filipino ang ating salita at dahil sa panuntunang ito, sila ay nagiging matatas sa pananagalog.

Samantala, ang mga ministrong Filipino ay dapat matutunan ang wikang pagkakatalagahan sa kanila. Isa ito sa mga dahilan kung bakit niyayakap ng maraming bansa sa mundo ang INC.”