Umento sa SSL pasado na sa Senado (Para sa public sector)

PASADO na sa pangatlo at pinal na pagbasa sa Senado ang Senate Bill 2671 o mas kilala sa Salary Standardization Law-IV (SSLIV)

Sa botong 14-0 na walang abstention, ipinasa ng mga senador sa kanilang sesyon nitong Lunes ng hapon ang panukalang batas na nagtatakda ng umento sa sahod ng mga empleyado ng pamahalaan.

Sa kabuuan ay may P225.8 bilyon pondo para sa SSL na ibibigay sa loob ng apat na taon, at sa taon 2016 ay nasa P57 bilyon ang inilaang pondo.

Sakaling agad maisabatas, magiging epektibo ang umento sa sahod ng mga manggawa ng gobyerno sa Enero 1, 2016.

Magugunitang inaprubahan na rin sa Kamara ang counterpart ng naturang panukalang batas.