Pagbabalik ni Fred Lim suportado ng mga pastor

NAGPAHAYAG ng suporta ang samahan ng mga pastor sa pagbabalik ni Alfredo S. Lim bilang alkalde ng Maynila sa nalalapit na 2016 elections, at tiniyak na ikakampanya ang mga lider na walang bahid ng korupsiyon.

Ang mga miyembro ng Christian Leaders for Good Government sa pangunguna ni Pastor Bani Miguel ay nakipagpulong kay Lim sa salo-salo sa almusal, para mangako ng suporta at lumahok sa panawagan sa dating alkalde na ibalik ang libreng pangunahing mga serbisyo sa lungsod.

Sinabi ng grupo, ipinagmalaki ang inisyatibo sa paglaban sa illegal na sugal nang lantarang nilabanan ang operasyon ng Jai-alai ilang taon na ang nakararaan, isinusulong nila ang “Love of God” at paglaban sa lahat ng uri ng korupsiyon sa public office.

Isinailalim nila sa ‘pray over’ si Lim, na kanilang pinuri sa pamumuhay sa public service nang walang bahid ng korupsiyon at umaasa silang gagayahin siya ng mga nagnanais na manungkulan.

Samantala, nangako si Lim na hindi bibiguin ang hiling ng mga pastor na ibalik ang kanyang flagship projects kabilang ang free hospitalization at totally free-education sa lungsod, hanggang sa kolehiyo.

Magugunitang sa kanyang termino bilang Manila mayor, ipinatayo ni Lim ang limang ospital sa lungsod na nagkakaloob ng libreng medical services sa mahihirap na residente, katulad ng Gat Andres Bonifacio Memorial Medical Center, Ospital ng Tondo, Jose Abad Santos General Hospital, Ospital ng Sampaloc at Sta. Ana Hospital.

Ipinaayos din niya ang nag-iisang ospital noon, ang Ospital ng Maynila.