Pamamaslang ni Duterte imbestigahan — HR lawyer

IKINABAHALA ng isang human rights lawyer ang mga pahayag ni Davao City Mayor Rodrigo Duterte kaugnay ng paraan niya sa pagsupil sa kriminalidad sa bansa.

Ayon kay Atty. Rod Domingo, nakalulungkot ang mga pahayag ni Duterte, lalo na’t isa siyang kandidato sa pagka-pangulo.

“Sana hindi totoo at hindi tototohanin ng isang kandidato ang ganitong pahayag.”

Ani Atty. Domingo, maaaring humantong sa anarkiya ang ganitong estilo ng pamumuno.

“Ating dapat ikatakot ang isang pangyayaring ganito sapagkat wala na tayong batas, wala na tayong konstitusyon.”

“Aalisin na ang husgado, aalisin ang ating mga pulis, siya na rin ang magiging hari, hindi tama ito,” dagdag niya.

Ayon pa sa abogado, ang estilo ni Duterte ay may wangis sa mga nangyari noong Martial Law. “Noong araw, may mga nawawala, kinikidnap, tino-torture.”

Bagama’t sa isang banda aniya ay naghahanap ang ating bansa ng isang lider na may kamay na bakal, hindi pa rin dapat isantabi ang karapatang pantao.

Giit ng abogado, dapat magkaroon ng imbestigasyon kasunod nang pag-amin ni Duterte sa pagpatay ng mga kriminal.

At kung sakaling mapatunayang nagkasala ang alkalde, dapat aniya ay mapatawan siya ng karampatang parusa.