P3-Trilyong budget sa 2016 aprub na (CCT budget ‘di  tinapyasan)

PINAGTIBAY na ng Bicameral Conference Committee ang mahigit P3 trilyong budget para sa susunod na taon.

Pinangunahan ni House Majority Leader Neptali Gonzales at House Appropriations Committee Chair Isidro Ungab ang paglagda sa panig ng Kongreso.

Habang sa Senado, pinangunahan ito nina Senate Finance Committee Chair Loren Legarda at Senate Minority Leader Juan Ponce Enrile.

Nabatid na walang bawas ang pondo para sa Conditional Cash Transfer na P62.5 bilyon, taliwas sa proposal sa Senado na bawasan ito ng P8 bilyon.

Samantala, dinagdagan ng P2.7 bilyon ang pondo para sa state college and universities.

Nanatili ang P4.7 bilyong pondo para sa veterans’ pension, P1.2 bilyong dagdag-allowance sa senior citizens, at P7 bilyon para sa umento sa sahod ng mga employado ng gobyerno.

Napanatili rin ang waste management fund.

Sa susunod na linggo inaasahang mararatipika ang national budget ng dalawang kapulungan ng Kongreso at inaasahang lalagdaan ni Pangulong Benigno Aquino III bago mag-Pasko.