Ombudsman Luzon tinulugan ang kaso ni Mayor Jesse Concepcion?

Ilang araw na lang at magpa-Pasko na naman muli.

Maraming kababayan natin ang naghihintay kung anong meron ang Pasko para sa kanila, lalo’t panahon ng eleksiyon na ang mga kandidato ay hindi makahihindi sa mga carolling, solicitations para sa Christmas Party ng kanilang constituents.

Pero sa mga taga-Mariveles, Bataan ang Pasko ay paghihintay sa resolusyon ng Luzon Ombudsman sa reklamong isinampa ng dating Konsehal na si Joseph Pereyra na ang halagang P3 milyong pondo ay inilabas umano ni Mayor Jesse Concepcion sa kaban ng bayan na ginamit daw sa Christmas Party ng bayan, maraming Pasko na ang nagdaan.

Ang pagpapalabas ng nasabing halaga ay hindi man lang daw dumaan sa Konseho upang gawan ng Resolusyon para magamit sa Christmas Party o para sa kapakinabangan ng mamamayan ng Mariveles.

Pero napag-alaman na ito ay kinobra at sinabing cash advance ni Mayor Concepcion, sa kung ano ang pinaggamitan ay ni hindi man lang naaninag o naramdaman ng taong bayan ng Mariveles.

Kundi ba naman, ang tibay pala ng loob nitong si Mayor Concepcion, may dati nang cash advance na kinuha sa kaban ng bayan at hindi pa nali-liquidate heto’t kumubra ulit? Kawawang mga taga-Mariveles…

Ilang Pasko na ang nagdaan, pero wala pa rin ang regalo ng Ombudsman para sa mga taga-Mariveles, Bataan.

Kailangan maaksiyonan ito ni Ombudsman for Luzon Atty. Mosquera? Mukhang inagiw na ang case folder ng nasabing reklamong hinihintay ng mga taga- Mariveles?

Ano pa ba ang hinihintay niyan, panibagong Pasko ulit? Malinaw pa sa sikat ng araw na paglabag sa Anti-Corrupt and Graft Practices ‘yan.

O baka naman may cold storage na riyan sa opisina ninyo at naging yelo na sa tagal ang mga reklamo laban sa mga tiwaling opisyales ng pamahalaan?!

Kung hindi man n’yo maaksiyonan ‘e ipaliwanag sa mga taga-Mariveles kung bakit inabot ng tatlong Pasko ang reklamo nila pero hindi pa rin nareresolba.

Ano ho ba ang alituntunin para matapos agad ang isang reklamong isinampa? Gaano ba talaga katagal dapat na iresolba ang reklamo sa mesa ninyo?

Inaalala ng mga taga-Mariveles, Bataan, ay maglaho sa kawalan ang kanilang mga reklamo laban sa katiwalian ng lokal na pamahalaan.

Kailangan pa bang si Ombudsman Conchita Morales Carpio ang makialam sa isyung ito!?

Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com