Gun ban exemption open na sa aplikasyon — Comelec

MAAARI nang makakuha ng aplikasyon para sa exemption sa election gun ban sa pamamagitan ng pag-a-apply ng Certificate of Authority (CA) na inilalabas ng Commission on Elections (Comelec).

Kabilang sa mga pinapayagang kumuha ng certificate ang pangulo ng bansa, pangalawang pangulo, mga senador at mga miyembro ng Kamara na hindi tatakbo sa halalan.

Ipatutupad na ng poll body ang pagbabawal nang pagbibitbit ng baril sa mga pampublikong lugar simula Enero 10 hanggang Hunyo 8, 2016.

Giit ni Comelec Spokesman James Jimenez, kahit lisensyado ang baril, ipagbabawal pa rin ang pagbibitbit nito dahil may hiwalay na permiso para sa mga aplikante nito.

Ang naturang sertipikasyon ay maaari lamang makuha mula sa Committee on the Ban of Firearms and Security Personnel (CBFSP) ng poll body.

Sino mang lumabag ay maaaring patawan ng isa hanggang anim na taon pagkakakulong.

Permanente na ring madiskwalipika sa paghawak ng kahit anong posisyon sa gobyerno at tatanggalan ng karapatang makaboto.

Maaari ring idaan sa online process ang pagkuha ng aplikasyon.