600 gramo ng shabu huli sa NAIA

ARESTADO ang isang 41-anyos babae makaraang makompiskahan ng 500 gramo ng shabu habang bumibili ng ticket sa Ninoy Aquino International Airport kahapon patungong Iloilo.

Ayon sa Police Aviation Security Group (Avsegroup), ang suspek ay kinilalang si Disa Kandu Ali, residente ng Dasmariñas, Cavite, nagtungo ng Terminal 3 dakong 2 a.m.

Pinigilan si Ali sa Departure Gate 6 ng terminal nang mapansin ng screeners ng Office for Transportation Security (OTS) ang kakaibang imahe sa security monitor makaraang dumaan ang kanyang bag sa X-ray machine.

Nang mabuksan, tumambad ang 500 gramo ng methamphetamine hydrochloride o shabu na magkakahiwalay na nakalagay sa limang plastic na pakete.

Ayon sa pulisya, bago nadakip si Ali, nagpunta siya sa Iloilo noong Disyembre 3, 2015, saka bumalik sa Manila makaraan ang ilang araw.

Si Ali ay nasa pangangalaga na ngayon ng Philippine Drug Enforcement Agency para sa kaukulang disposisyon.