P64-B CCT ng DSWD tatapyasan ng P8-B (Malacañang humirit ng konsiderasyon)

UMAASA si Pangulong Benigno Aquino III na ikokonsidera ng mga senador ang desisyon na tapyasan ng walong bilyong piso ang budget ng conditional cash transfer (CCT) program ng Department of Social Welfare and Development (DSWD) sa 2016.

Sa panukalang badyet ng Malacañang, umaabot ang CCT funds ng halagang P64-bilyon sa susunod na taon.

Ayon kay Communications Secretary Herminio Coloma Jr., nananalig si Pangulong Aquino na maiisip ng mga senador ang magiging epekto nito sa apat na milyong pamilyang Filipino na mga benipisyaryo ng CCT program.

“We trust our legislators will consider the implications of their decisions on the CCT beneficiaries who are the most important stakeholders in our efforts to achieve inclusive growth,” ani Coloma.

Inaabangan aniya ng Palasyo ang ano mang resulta ng deliberasyon ng mga mambabatas sa bicameral conference committee sa naturang usapin.

“We shall await the outcome of the deliberations of the bicameral conference committee on the matter,’ pahayag pa ni Coloma.