Ex-Bucor execs swak sa iregular na P3.7-M bidding

KINASUHAN sa Office of the Ombudsman ang ilang opisyal ng Bureau of Corrections (BuCor) ng paglabag sa Anti-Graft and Corrupt Practices Act at Government Procurement Reform Act.

Nahaharap sina dating BuCor Acting Director Gaudencio Pangilinan at Chief Administrative Officer Ligaya Dador ng limang counts sa paglabag sa Section 3 ng Anti-Graft and Corrupt Practices Act.

Habang ang mga administrative officer na sina Pangilinan at Larry Hari ay nahaharap sa isang count ng paglabag sa Government Procurement Reform Act.

Ang Chief of Staff na si Venancio Santidad, kasama ang representatives ng suppliers ng Grand Potential Press Inc., at Dotgain Solutions na sina Alman Madrid, Lawrence Balolong, Julita Balolong, Alex Del Rosario, Alicia Madrid, Nelson Lee Cheng, Gina Rabancos at Paulino Fernandez, Jr., ay nahaharap din sa kaso ng paglabag ng Anti-Graft and Corrupt Practices Act.

Nabatid na may pananagutan sina Pangilinan, Dador at Hari sa grave misconduct na agad sinibak sa serbisyo at hindi na maaaring humawak ng kahit ano mang posisyon sa gobyerno.

Base sa imbestigasyon ng Ombudsman, nalaman nila na noong 2012 at hinati ng mga respondent ang kontrata sa apat para sa konstruksyon ng gusali sa National Bilibid Prison bilang pag-iwas sa kinakailangang public bidding.

Ang P1.4 milyong proyekto ng impraestruktura ay ibinigay sa mga small value procurement at sa mga pinili nilang suppliers na Grand Potential and Dotgain.

Ibinunyag din ng Ombudsman ang paggasta ni Pangilinan at ng iba pa sa P2.3 milyon sa kasagsagan ng BuCor’s road map launch, na para sa lamang sa pagkain, giant tarpaulins at tents na nauwi sa agarang pagbili imbes sumailalim sa bidding.

Ayon kay Ombudsman Conchita Carpio-Morales, walang edidensiya na magpapakita na sinubukan ng BuCor ang pinakamainam na presyo na magbibigay benepisyo para sa gobyerno.