Kasambahay pinatay ng bayaw ng amo (Nagalit nang ‘di papasukin)

AGAD binawian ng buhay ang isang kasambahay makaraang saksakin ng bayaw ng kanyang amo nang hindi niya papasukin sa pinagsisilbihang bahay sa Caloocan City, kamakalawa ng hapon.

Kinilala ang biktimang si Janet Magana, 23, stay-in housemaid sa Block 4, Lot 25, Kalap Subdivision, Brgy. 177, Camarin ng nasabing lungsod.

Arestado at nakapiit na ang suspek na si Emmanuel Boado, 36, naninirahan sa Block 7, Lot 2, Northville 4-A Subdivision, Marilao, Bulacan.

Base sa impormasyon mula kay Caloocan Police chief, Sr. Supt. Bartolome Bustamante, naganap ang insidente dakong 3 p.m. sa bahay ng amo ng biktima na si Federico Castillo.

Ayon sa ulat, nagtungo ang suspek sa bahay ng kanyang bayaw upang bisitahin ang kanyang kapatid na babae ngunit hindi pinapasok ng biktima dahil na rin sa utos ng kanyang among lalaki.

Minasama ito ni Boado kaya’t nagkaroon sila nang mainitang pagtatalo.

Pagkaraan ay bumunot ng  patalim  ang suspek at inundayan ng saksak ang biktima.