TRO kontra no bio, no boto inisyu ng SC

NAG-ISYU ng temporary restraining order (TRO) ang Supreme Court (SC) sa ipinatutupad na “No bio, no boto” policy ng Comelec.

Nangangahulugan ito na muling nabuksan ang posibilidad na makaboto, kahit ang walang kompletong biometrics data.

Una rito, dumulog sa Korte Suprema ang Kabataan party-list para kwestiyonin ang constitutionality ng “No bio, no boto” campaign ng Comelec.

Sa kanilang 32-pahinang petition for certiorari and prohibition, sinabi ni Kabataan party-list Rep. Terry Ridon, umaabot sa mahigit sa 3,000,000 botante ang nawalan ng karapatang bumoto dahil sa nasabing polisiya ng poll body.

Bukod dito, kinuwestyon din ng Kabataan Party-list ang October 31, 2015 deadline para sa nasabing kampanya.

Sa kanilang naunang petisyon, iginiit na base sa umiiral na Election Omnibus Code, 120-days bago ang mismong araw ng eleksyon ay maaari pang magpa-rehistro ang isang bontante.

Kung susundin ang batas, maaari pa raw magparehistro ang isang bontante hanggang sa unang linggo ng buwan ng Enero 2016.

Ngunit sa panig ng Comelec, sinabi nilang kakapusin ng panahon sa election preparation kung pagbibigyan ang kahilingan ng petitioner.