Polish mountainer, Pinoy guide missing sa Mt. Kanlaon

BACOLOD CITY – Patuloy na pinaghahanap ang isang Polish trekker at kanyang guide na sinasabing nag-mountain climbing sa Mount Kanlaon bago nangyari ang steam emission nitong Lunes ng gabi.

Sinabi ni Canlaon City, Negros Oriental Mayor Jimmy Clerigo, pinagbigay-alam ng kanilang tourism office ang tungkol sa pag-akyat ng Polish mountain climber na si Anna Hudson at guide niyang si Balmer Villar sa Mount Kanlaon ngunit sinabing hindi dumaan sa entry points na sakop ng kanilang lungsod.

Ayon kay Mayor Clerigo, maaaring sa ibang bahagi ng bulkan dumaan ang dalawa dahilan upang hindi sila nakapagparehistro sa entry points sa Brgy. Masulog at Brgy. Malaiba, Canlaon City.

Ngunit nakatanggap nang impormasyon ang alkalde na bago nangyari ang pagbuga ng usok ng bulkan ay nakababa na sina Hudson at Villar.

Sa kabila nito ay nagtutulungan ang mga rescue team sa paghahanap sa dalawa.

Sa ngayon, nananatiling nasa alert level 1 ang bulkan at mahigpit na ipinagbabawal ang lumagpas sa 4-kilometer permanent danger zone.