Kolehiyala sinaksak ng basted na admirer

LEGAZPI CITY – Nagpapagaling na sa ospital ang 19-anyos college student ng Bicol University makaraang pagsasaksakin ng kanyang manliligaw sa Guinobatan, Albay kamakalawa.

Kinilala ang biktimang si Janice Villasis y Villamore, taga-Masbate ngunit pansamantalang tumutuloy sa Brgy. Calsada sa nasabing bayan.

Ahon kay Chief of Police Luke Ventura ng Guinobatan Municipal Police Station, matagal nang manliligaw ng biktima ang suspek na si Rodolfo Paloma Jr. y Quedes, 23-anyos, Grade 9 sa isang pampublikong paaralan sa Guinobatan.

Sa inisyal na imbestigasyon, pauwi na ang biktima kasama ang mga kaklase nang salubungin ng suspek at inundayan ng saksak.

Sinasabing ito ay dahil sa pagbasted ng biktima sa panliligaw ng suspek.

Sa ngayon, nakakulong na si Paloma habang inihahanda na ang kasong isasampa laban sa kanya.