2 FA-50s fighter jets na binili sa S. Korea darating na

AMINADO ang pamunuan ng Philippine Air Force (PAF) na super excited sila sa pagdating ng dalawang fighter jets sa bansa. 

Sa Biyernes, Nobyembre 27, ide-deliver sa bansa ang dalawa sa 12 FA-50s fighter jets na binili ng pamahalaan sa South Korea.

Ayon kay Philippine Air Force (PAF) spokesperson Col. Enrico Canaya, lalapag ang dalawang fighter jets sa Clark Air Field Pampanga mula sa South Korea.

Ito ang kauna-unahang touchdown ng fighter jets sa Philippine soil.

Sinabi ni Canaya, mismong si Defense Secretary Voltaire Gazmin ang sasalubong sa pagdating ng dalawang fighter jets.

Pahayag ni Canaya, mga pilotong Korean pa ang magpapalipad ng nasabing fighter jets dahil pagdating sa bansa, magkakaroon ng acceptance flight at saka magkakaroon ng formal turn-over sa Philippine Air Force (PAF).

Nilinaw ni Canaya, sa pagdating ng dalawang fighter trainer jets ay hindi pa magaganap ang formal turn-over dahil may mga proseso pa itong daraanan bago mapasakamay ng AFP ang dalawang bagong trainer jets.

Pagtiyak ng opisyal, ang 10 iba pang jets ay ide-deliver sa bansa ng dalawang batches hanggang 2017.