9 informants nakatanggap ng P22.5-M reward

NAGING instant milyonaryo ang siyam civilian informants na tumanggap ng reward money kahapon.

Hindi pinangalanan ng AFP ang siyam impormante na binigyan ng pabuyang salapi para na rin sa kanilang seguridad.

Ayon kay AFP spokesperson Col. Restituto Padilla, ang P22.5 milyon ay paghahatian ng 9 tipsters.

Ito ay reward sa pagkakadakip sa dalawang mataas na miyembro ng NPA, tatlong lider ng Abu Sayyaf at apat tauhan na itinuro ng mga impomante sa mga awtoridad.

Pinakamataas na may patong na reward na P5.8 milyon ang nadakip na NPA commander na si Eduardo Esteban, ikalawa ang ASG na si Khair Mundos na may P5.3 milyon reward.

Sa P22.5 milyong reward na pinakawalan para sa siyam masuwerteng informant, naglalaro sa P350,000 hanggang P5.8 milyon ang natanggap nang mapapalad na claimants.

Ayon kay AFP chief Gen. Hernando Irriberi, malaki ang naging papel ng siyam impormante sa pagkakahuli sa dalawang lider ng NPA, tatlong Abu Sayyaf at apat mga kasamahan.

Kabilang sa mga nahuli si Esteban, lider ng NPA na wanted sa murder sa Abra, at ASG sub-leader Khair Mundos, natiklo sa Paranaque noong Hunyo 2014, habang napatay si ASG commander Long Malat Sulayman sa Basilan noong Abril 2012.