11 sugatan sa 3 grenade blast sa S. Kudarat

KORONADAL CITY- Umaabot sa 11 ang sugatan makaraang sumabog ang dalawa sa tatlong granadang inihagis dakong 8:20 p.m. kamakalawa malapit sa provincial kapitol ng Sultan Kudarat habang nagdaraos ng concert kasabay ng selebrasyon ng Kalimudan Festival.

Kinilala ang mga sugatan na sina Abix Mamansuan Sandigan, 33; Regine Simsim, 40; Darius John Padilla, 6; Jasper Linda, 11, Baltazar Linda, 49; Cenilia Linda, 45; Sahid Salindab, 27; Ann janeth Latip Salindab, 21; Michael John Cinco, 20; Lilibeth Perolino, 45; Almasir Ibrahim, 22, kritikal ang kalagayan.

Sa inisyal na imbestigasyon ng mga awtoridad, pasado 8 p.m. nang sumabog ang dalawang granada malapit sa pump machine ng isang gasolinahan malapit sa kapitolyo.

Napag-alaman, nakita sa likod ng naka-file na soundbox na gagamitin para sa concert, ang isa pang hindi sumabog na granada, detonated dakong 6:44 a.m. kahapon.

Ayon sa mga awtoridad, posibleng ang target ng pagsabog ay si Rep. Raden Sakaluran, 1st district, Sultan Kudarat, dahil 20 metro lamang ang layo ng kanyang kinauupuan sa lugar ng pagsabog.

Posible rin anilang pananabotahe ang motibo sa pagsabog dahil sa selebrasyon ng Kalimudan Festival kahapon.