Poe leading, Binay, Roxas, Santiago tumaas (Sa Pulse Asia Survey)

NANGUNGUNA pa rin sa latest Pulse Asia survey si Sen. Grace Poe para sa mga kandidatong presidente sa 2016 elections.

Sa pinakahuling presidential survey na ginawa mula Oktubre 18-29, 2015 sa 3,400 respondents, nasa top spot pa rin ng listahan si Poe dahil nakuha niya ang 39 percent.

Umangat pa ang senadora ng 13 puntos mula sa 26 percent noong Setyembre.

Nasa pangalawang puwesto si Vice President Jejomar Binay na nakakuha ng 24 percent, mula sa dating 19 percent.

Habang umakyat ng isang puntos si dating Interior Sec. Mar Roxas sa 21 percent.

Dahil dito, nanatili siya sa ikatlong puwesto kagaya nang nakaraang survey.

Malaki rin ang itinaas ni Sen. Miriam Defensor-Santiago, dahil mula sa tatlong porsyento ay naging 11 porsyento na.

Habang nanguna sa vice presidential survey si Sen. Francis Escudero na nakakuha ng 43 percent.

Umaabot sa 20 percent ang iniakyat ng puntos ni Escudero mula sa 23 percent lamang noong Setyembre.

Sinundan siya ni Sen. Ferdinand Marcos sa ikalawang puwesto na may 21 percent mula sa dating 13 percent lang.

Pangatlo si Sen. Alan Peter Cayetano na may 11 porsiyento mula sa dating siyam na puntos lamang noong nakaraang survey.

Bahagyang tumaas nang apat ang dating tatlong porsi-yento ni Camarines Sur Rep. Leni Robredo na ngayon ay may pitong porsiyento na.

Kasunod si Sen. Antonio Trillanes IV na nakakuha ng anim na porsyento mula sa dating apat na porsiyento lamang.

Ang naturang survey ay kinomisyon ng isang pribadong organisasyon.