PH agri naiwan, APEC non-binding — Briones (Gastos higit sa P10-B na)

HINDI lamang P10 bilyon ang gastos ng bansa para sa Asia Pacific Economic Cooperation (APEC) economic leaders’ meeting, ayon kay dating national treasurer at propesor Leonor Briones.

Sinabi ni Briones, higit pa sa taya ng paggasta ang aktuwal na ginugol para sa APEC.

Aniya, bukod sa mga ginastos para sa paghahanda para sa APEC, posible aniyang humingi ng tax rebate ang mga airline company na nagkansela ng kanilang mga biyahe upang bigyang-daan ang pagpupulong.

Hindi rin aniya kabilang sa taya ang kaltas sa sahod ng mga namamasukang nahuli sa trabaho o kaya’y hindi na nakapasok dahil sa pagsasara ng daan.

Samantala, hindi ipinagkaila ni Briones na may naitulong ang APEC sa bansa. 

Aniya, sa pamamagitan ng APEC, umusbong ang kalakalan at mga serbisyo sa bansa.

Nadagdagan din aniya ang mga milyonaryo sa bansa.

Malaki aniya ang pakinabang ng mga mang-aangkat, may-ari ng shopping malls, at mga nagpapatakbo ng casino.

Ngunit, naiiwan aniya ang sektor ng agrikultura.

“Iyong agrikultura kung saan tayo nanggagaling, maraming Filipino ang nandoon, iyon talaga ang naiiwan.”

Gayonman, wala aniyang magagawa ang APEC para rito. “It has nothing to do with APEC; it has everything to do with policies dito.”

Nilinaw ni Briones na hindi ‘binding’ ang mga napagkasunduan sa APEC.

Nakadepende aniya sa economic leaders kung papayag sila sa mga kondisyong pag-uusapan.

Pagbalik aniya ng mga lider sa kani-kanilang bansa, muling nakadepende sa Kongreso ang pagpayag sa mga kasunduan.