Militanteng grupo nag-vigil sa Mendiola

MAGDAMAG na nag-vigil sa Mendiola ang mga progresibong grupong tutol sa pagsasagawa ng Asia-Pacific Economic Cooperation (APEC) economic leaders’ meeting sa bansa.

Nagsindi ng sulo ang iba’t ibang katutubong grupo, Miyerkoles ng umaga, bilang panawagan sa pamahalaan.

Anila, mas dapat na unahin ang mga katutubong nasa mga bundok kaysa gugulin ang pondo ng bayan para sa APEC at paboran lamang ang mga negosyante.

Panawagan din nilang itigil ang militarisasyon at ang pagmimina sa kani-kanilang mga lugar.

Susubukan anila ng mga katutubong grupo na makalapit sa Roxas Boulevard, partikular na sa embahada ng Estados Unidos.

Sarado ang Mendiola dahil na naturang pagkilos.

Samantala, ilang religious groups din ang nagdaos ng rally sa Rajah Sulayman Park sa Maynila nitong Miyerkoles.