4 NAIA cops sinibak sa tanim-bala

SINIBAK na sa kanilang puwesto ang apat pulis mula sa National Capital Region (NCR) unit ng Philippine National Police Aviation Security Group (PNP AVSEGROUP) bunsod nang sinasabing pangongotong kay American missionary Lane Michael White.

Ayon kay PNP AVSEGROUP spokesperson, Chief Insp. Vicente Castor, ang mga sinibak sa puwesto habang iniimbestigahan ay sina SPO1 Rolando Clarin, SPO2 Romy Navarro, Chief Insp. Adriano Junio, at Chief Insp. Eugene Juaneza, ang lider ng  investigation unit.

Ang lider ng PNP AVSEGROUP NCR unit, na si Sr. Supt. Ricardo Layug Jr., ay una nang sinibak sa puwesto bunsod ng ‘tanim-bala’ controversy sa NAIA.

Sa kanyang salaysay sa National Bureau of Investigation (NBI), kinilala ni White sina Clarin, Navarro at Junio na ang tatlong pulis na humingi sa kanya ng P30,000 kapalit nang hindi paghahain ng kasong illegal possession of ammunition.

Si White, 20-anyos, ay patungo sana sa Coron, Palawan kasama ang kanyang ama at stepmother, noong Setyembre 17 ngunit pinigil nang may makitang bala sa kanyang bagahe.

Itinanggi ni White na siya ang may-ari ng .22-caliber bullet na sinasabing natagpuan ng airport security screeners sa kanyang bagahe, at sinabing hindi niya batid kung paano ito napunta sa kanyang bag.

“Ito po ay command decision na ilipat muna temporarily sa headquarters in support na rin po sa ongoing investigation being conducted by NBI to determine the truth behind this,” pahayag ni Castor.