Sarili sinilaban ni lola

TUGUEGARAO CITY – Natuluyan ang isang lola sa kanyang ikaapat na tangkang pagpapakamatay nang sunugin ang kanyang sarili sa bayan ng Peñablanca, Cagayan kamakalawa.

Dumanas ng second degree burn ang biktimang si Martina Furigay, 67-anyos, may-asawa, at residente ng Sitio Dana, Brgy. Manga, Peñablanca.

Sa ulat, napansin ng isang residente ang biktima na gumagapang sa labas ng kanyang bahay habang  nasusunog na nagresulta sa kanyang agarang kamatayan.

Ayon sa mister ng biktima na si Domingo, posibleng ginamit ng matanda ang anim na litrong gasolina sa pagsunog sa sarili.

Sinasabing hindi nakayanan ng biktima ang depresyon nang mamatay ang kanilang anak. Ang unang pagtatangka ng biktima sa buhay ay noong gilitan niya ang kanyang leeg.

Sa pangalawa at pangatlong tangkang pag-suicide ay uminom siya ng zonrox at binuhusan angs sarili ng mainit na tubig.

Bukod sa ‘di matanggap ang pagkamatay ng anak ay may kapansanan din siya sa pag-iisip na pinaniniwalaang nakadagdag sa kanyang depresyon.