Obrero kritikal sa stepson

KRITIKAL ang kalagayan sa pagamutan ng isang obrero makaraang pagsasaksakin ng anak ng kanyang kinakasama dahil inaalila sa kanilang bahay at sa pinapasukan nilang construction site sa Caloocan City kamakalawa ng gabi.

Ginagamot sa Nova District Hospital ang biktimang si Lemuel Umugtong, 40, ng Phase 2, Block 2, Lot 22, Green Ville Subd. Brgy. 171, Bagumbong ng nasabing lungsod, sanhi ng mga tama ng saksak sa iba’t ibang bahagi ng katawan.

Habang pinaghahanap ang suspek na si Arnold Tumaka, 24, anak ng kinakasama ng biktima, mabilis na tumakas makaraan ang insidente.

Batay sa ulat ng pulisya, dakong 11 p.m. lasing na kinompronta ng suspek ang biktima tungkol sa kanilang trabaho.

Sinasabing nagtanim ng galit ang suspek sa biktima dahil ginagawa siyang utusan sa mga gawain sa kanilang bahay hanggang sa pinapasukan nilang construction site.

Nagpaliwanag ang biktima na nais lamang niyang matuto ang suspek sa kanilang trabaho na nagresulta sa kanilang mainitang pagtatalo.

Sa puntong ito, bumunot ng patalim ang suspek at inundayan ng saksak ang biktima bago mabilis na tumakas.