Nagnakaw ng bigas kritikal sa taga ng may-ari

NAGA CITY – Kritikal ang kalagayan ng isang lalaki makaraang tagain ng may-ari ng ninakawan niyang bodega ng bigas sa Brgy. San Vicente, Baao, Camarines Sur kamakalawa.

Kinilala ang suspek na si Agosto Pilitina, 33-anyos.

Napag-alaman, nagising ang may-ari ng bodega na si Dolores Badong nang makarinig ng kaluskos.

Agad ginising ng ginang ang kanyang dalawang anak na sina Alberto at Alex para tignan ang kanilang bodega at doon nahuli sa akto na nagnanakaw ng sako-sakong bigas si Pilitina.

Tinangkang tumakas ng suspek nang mahuli ngunit bago tuluyang nakalayo ay pinagtatag siya ni Alex.

Tadtad ng taga sa iba’t ibang bahagi ng katawan si Pilitina na agad isinugod sa pinakamalapit na pagamutan.

Habang nahaharap sa kasong serious physical injuries ang anak ni Dolores na si Alex dahil sa pananaga sa suspek.

Samantala, nananatiling nasa pagamutan ang suspek na nahaharap sa kasong robbery.