Metro Manila full alert sa Undas — NCRPO

EPEKTIBO 6 a.m. ngayong araw ay naka-full alert na ang National Capital Region Police Office (NCRPO) para sa paggunita sa All Saint’s Day at All Soul’s Day.

Ibig sabihin ang buong puwersa ng pulisya sa buong Metro Manila ay dapat naka-duty na at lahat ng ‘leave’ ay kanselado na rin.

Ayon kay NCRPO spokesperson Chief Inspector Kimberly Molitas, magtatagal ang full alert ng NCRPO hanggang Nobyembre 3.

Ngunit desisyon na aniya ng field commanders kung kanilang i-extend sa kanilang lugar na nasasakupan.

Sa ngayon, mayroong higit 8,000 pulis sa buong Metro Manila, ilan dito ang ipadadala sa 98 sementeryo sa bansa upang magbigay ng seguridad sa ating mga kababayan na magtutungo sa mga libingan bago at sa mismong araw ng mga patay.

Dagdag ng NCRPO, wala silang namo-monitor na banta sa seguridad para sa araw ng Todos Los Santos.

Pahayag ni Molitas, nakapagsagawa na sila ng coordinating conference sa local government units para sa maayos na pagpapatupad ng Oplan Kaluluwa 2015.

Aniya, bawat sementeryo ay may police assistance hubs, maging sa bus terminals, pier at airport para sa maayos na pagbiyahe ng ating mga kababayan.

Tiniyak din ni Molitas na bagama’t nakatutok sila sa pagpapatupad ng Oplan Kaluluwa ay may sapat pa rin silang puwersa para sa law enforcement operations.