Inmate utas sa kuyog ng 67 preso?

NAGTUTURUAN ang 67 preso sa Manila Police District-Police Station 6 hinggil sa pagkamatay ng isang rape suspect na sinasabing pinagtulungang bugbugin sa selda at nang dalhin sa Prosecutor’s Office ay nangisay at binawian ng buhay dakong 2:30 p.m. nitong Oktubre 24.

Unang iniulat na namatay sa sakit na epilepsy habang nilalapatan ng lunas sa Philippine General Hospital (PGH) ang rape suspect na si Gerardo Argota Jr., 45, carwash boy, ng Tenement Housing sa F. Manalo, Punta, Sta. Ana, Maynila.

Gayonman, sinabi ni SPO1 Alonzo Layugan, imbestigador ng MPD-Homicide Section, lumabas sa autopsy report na ang ikinamatay ni Argota ay “blunt traumatic injury thru clubbing,” dahilan para dalhin sa MPD-HS at imbestigahan ang 9 preso ng MPD-PS 6, kabilang si Mayores John Cris Lopez, 23-anyos.

Kasama sa iniimbestigahan sina Salvador Gozon, 41; Rowie Manalac, 23; Jay Villamor, 22; Michael dela Cruz, 23; Bernardo Lasartin, 40; Jermaine Robles, 29; Alvin Magno, 26; at Louie Mercado.

Aminado ang ilang preso na sinaktan nila si Argota nang dumating ang ina ng biktimang sinasabing ginahasa ng suspek, dakong 2:30 a.m. at sumisigaw dahil sa matinding galit.

Nabatid na si Argota ay nangisay sa harap ng prosecutor dahilan para atasan ang mga pulis na escort na isugod sa PGH ngunit binawian ng buhay habang nilalapatan ng lunas.

Si Argota ay inaresto ng mga barangay tanod at  ikinulong sa MPD-PS 6.