INC dasal para kay Menorca (Isyu maaaring samantalahin)

“KUMAKATOK sa tarangkahan ng langit” sa paraan ng panalangin ang mga pinuno ng Iglesia ni Cristo (INC) para humingi ng “kaliwanagan” ukol sa dati nilang kasamahan sa panunungkulan.

Ito ay sa gitna ng alegasyong itinago nila ang dating ministro ng Iglesia Ni Cristo (INC) na si Lowell Menorca nang labag sa sarili nitong kalooban.

Ayon sa INC legal counsel na si Atty. Patricia-Ann Prodigalidad, higit pa sa banta ng mga kasong isasampa laban sa kanila ni Menorca, mas pinangangambahan umano nila na baka “samantalahin ng iba” ang usaping ito laban sa kanila.

“Ang mga opisyal ng INC ay nanunungkulan bilang tagapagsilbi ng kanilang pananampalataya at pangunahin dito ay pagtiyak sa ikabubuti ng kanilang mga kaanib, at ang damdaming ito ay tumutulay kahit doon sa mga dating kasamahan. Kaya nga kahit naging tampulan ng mga paratang, patuloy silang nananalangin para kay Ginoong Menorca, sampu ng kanyang pamilya,” ayon kay Prodigalidad.

Binigyang-diin ng abogada na tutugunan ng pangasiwaan ng INC ang mga alegasyon sa tamang bulwagan at makikipagtulungan sa mga may kapangyarihan dahil batid nila na kapag tatratuhin sila nang naaayon sa katuwiran, mapapatunayan nilang sila ay inosente sa mga napapaulat na paratang.

Buong pagtitiwalang umaasa ang abogada at ang kanyang mga kliyente na “hahakbang ang hukuman nang may kahusayan at magpapasya nang may pagtalimang naaayon sa batas.”

Ikinababahala rin ng matataas na opisyal ng INC, ayon kay Prodigalidad, ang “timing” ng mga alegasyong naglabasan.

“Ngayong mahigit anim na buwan na lang bago ang halalan, hindi natin maipagkakait sa kanila kung sila’y mangamba laban sa banta ng pananamantala ng mga kampong nagnanais politikahin ang nasabing isyu sa harap ng masinsing atensyon ng media,” ani Prodigalidad. 

“Hiling nila, kung ano ang nararapat at makatarungan – na ituturing ang hablang ito kagaya ng karaniwang kaso lamang,” paliwanag ni Prodigalidad. “Ipinagdarasal din nilang sila ay makaranas ng mga karapatang tinatamasa ng lahat sa atin, lalong-lalo na ang “presumption of innocence.”

“Mali ang mga paratang, at papatunayan namin ang kabalintunaan n ito,” dagdag ng abogada kasabay ng paalala na ang mga usaping ito ay “sub judice” na sa ngayon.