Torre idedepensa ang titulo (Battle of the GMs)

NAKATAKDANG idepensa ni Asia’s first grandmaster Eugene Torre ang kanyang titulo sa pagsulong ng Battle of the Grandmasters National Chess Championships ngayong araw na gaganapin sa PSC Athletes’ Dining Hall sa Rizal Memorial Sports Complex.

Paniguradong dadaan sa butas ng karayom ang 63 anyos at chess legend dito sa Pilipinas na si Torre dahil makakalaban niya ang ibang matitikas na GMs sa bansa kasama ang mga National players pool.

Si Woman International Master Catherine Pereña Secopito naman ang magdedepensa sa Women’s Division.

Mag-uumpisa ang opening ceremony sa alas dos ng hapon kung saan dadalo ang mga opisyales ng National Chess Federation of the Philippines (NCFP) sa pangunguna ni Chairman at President Prospero “Butch” Pichay Jr., Secretary General Congressman Abraham “Bambol” Tolentino, Grassroots Development and Promotions Committee Chairman Congressman Neri Javier Colmenares, Treasurer Red Dumuk at Executive Director Grandmaster Jayson O. Gonzales.

Ang nasabing tournament ay inorganisa ng National Chess Federation of the Philippines (NCFP) na suportado ng Philippine Sports Commission (PSC) sa pakikipagtulungan ng Philippine Olympic Committee (POC).

Samantala, maaari pang magpatala ang mga qualified players ngayong araw.

(ARABELA PRINCESS DAWA)