Guro tumalon mula 25ft. tulay, ligtas (Sa Quezon Province)

NAGA CITY – Himalang nakaligtas ang isang guro makaraang tumalon mula sa 25 talampakang taas ng tulay ng Brgy. Bulakin 2, Dolores, Quezon kamakalawa.

Kinilala ang biktimang si Diwata Bonquin, 45-anyos.

Ayon sa ulat, nabigla ang mga residente nang biglang sumampa ang nasabing guro sa tulay at walang pag-aalinlangang tumalon.

Nasugatan ang biktima nang tumama sa mga bato sa ilog makaraang tangayin ng tubig.

Agad nagtulong-tulong ang mga residente upang isalba ang guro at nang makuha ay agad isinugod sa ospital.

Sa imbestigasyon ng PNP-Dolores, napag-alamang nakararanas ng depresyon ang guro dahil sa mga problema sa kanilang pamilya.

Sa ngayon, patuloy pang ginagamot ang biktima sa ospital.