10-wheeler truck sumalpok sa poste 3 sugatan

BAGUIO CITY – Isinugod sa pagamutan ang driver ng isang 10-wheeler cargo truck at dalawa pang biktima makaraang bumangga ang kanilang sasakyan sa poste ng koryente sa Bokawkan road, Lungsod ng Baguio, kahapon ng madaling araw.

Kinilala ang driver ng truck (XBY-674) na si Rolando Benzon, nasa legal na edad, tubong San Fernando, Pampanga, habang ang dalawang kasama niya ay dumanas ng minor injuries lamang.

Ayon sa mga imbestigador, may kargang tiles at plywood ang naturang truck mula sa Bokawkan at patungo sana sa La Trinidad, Benguet nang mawalan ng preno.

Napag-alamang binangga nito ang isang van (NOM-847) na pag-aari ni Camelo dela Cruz, ngunit hindi nasaktan ang driver.

Makaraang mabangga ng truck ang naturang van ay dumiretso sa isang poste ng koryente bago tuluyang sumalpok sa isang tindahan.