Magsasaka todas sa BFF

CAUAYAN CITY, Isabela – Patay ang isang magsasaka makaraang makipagsaksakan sa katagay na kaibigan sa Brgy. Ara, Benito Soliven, Isabela kamakalawa.

Kinilala ang biktimang si Diosdado Castillo, 30, may asawa, habang ang suspek ay si Sebastian Vidad, 29, kapwa magsasaka at residente ng Brgy. Ara.

SSa imbestigasyon ng Benito Soliven Police Station, nagkaroon nang mainitang pagtatalo ang dalawa sa hindi pa mabatid na dahilan na nauwi sa pananakit ni Castillo kay Vidad habang nag-iinoman.

Umuwi si Vidad sa kanilang bahay upang kumuha ng panabas at kinompronta si Castillo sa ginawang pananakit sa kanya.

Unang iwinasiwas ni Castillo ang nakuhang panabas ngunit nakailag si Vidad at siya naman ang tinaga.

Dinala sa ospital si Castillo ngunit idineklarang dead on arrival habang si Vidad ay inaresto at sasampahan ng kasong pagpatay.