Dinukot na sanggol natagpuang patay sa kanal

NAGCARLAN, Laguna – Patay na nang matagpuan kamakalawa ang isang taon gulang na sanggol makaraang dukutin ng hindi nakilalang suspek nitong Linggo habang natutulog sa loob ng kanilang bahay sa Bgy. Malaya, Nagcarlan, Laguna.

Sa report na ipinadala ni Chief Inspector  Leopoldo Ferrer, hepe ng Nagcarlan Police, kay Acting Laguna PNP provincial director, Senior Supt. Florendo Saligao, kinilala ang biktimang si Lance Macahiya, anak ng mag-asawang sina Leo at Walen Macahiya, residente ng nasabing lugar.

Sa pagsisiyasat ni PO1 Maggie Tabang, iniulat na nawawala ang biktima dakong 7 p.m. nitong Linggo makaraang iwanang natutulog kasama ng nakatatandang kapatid na lalaki sa loob ng kanilang bahay.

Sinasabing umalis ang ama upang magtungo sa bahay ng biyenan habang wala pa ang ina dahil nasa trabaho pa. 

Ngunit makalipas ang mahigit isang oras nang bumalik si Leo ay hindi na nadatnan sa higaan ang bunsong si Lance.

Agad nagsadya ang ama sa himpilan ng pulisya at ipinagbigay-alam ang pagkawala ng sanggol.

Hinanap nila ang sanggol ngunit laking panlulumo ng mga magulang nang dakong 7:05 a.m. kamakalawa ay matagpuan ang biktimang wala nang buhay sa isang kanal. 

Patuloy ang imbestigasyon ng pulisya sa insidente.

Boy Palatino