4-anyos paslit sinakmal ng asong ulol

DAGUPAN CITY – Hinihintay pa ang resulta ng pagsusuri sa samples ng asong ulol na sumakmal sa 4-anyos lalaking paslit sa lungsod ng Dagupan kamakalawa.

Nagpapagaling pa ang biktima mula sa sugat sa kanyang likod, balikat at braso na sinakmal ng hinihinalang asong ulol.

Kuwento ng biktima, naglalakad siya sa gilid ng kalsada nang bigla na lamang lapitan ng aso.

Bunsod ng takot ay agad tumakbo ang paslit ngunit hinabol ng aso at sinakmal.

Agad nadala sa ospital ang paslit na tinurukan ng anti-rabies bagama’t patuloy na inoobserbahan ang kalagayan.

Samantala, minabuti ng ilang residente na patayin ang nakakagat na aso upang wala nang ibang mabiktima habang dinala sa Research Institute for Tropical Medicine (RITM) ang samples ng aso upang masuri.

Ayon sa ilang residente, noong nakaraang linggo pa napansin ang pagbabago sa kilos ng aso na kinain ang ilang bagong silang na tuta at laging umaalulong na senyales ng isang hinihinalang ulol na aso.