Sekyu nanaksak katagay patay (Binuskang ‘under’ ni misis)

PATAY ang isang 23-anyos lalaki makaraang saksakin sa leeg ng kanyang kainomang security guard na tinukso niyang ‘under’ ng kanyang misis kahapon ng madaling-araw sa Tondo, Maynila.

Binawian ng habang dinadala sa Gat Andres Bonifacio Memorial Medical Center ang biktimang si Reymalon Azuelo, 23, ng 225 Gate 10, Area B, Parola Compound, Tondo.

Habang tinutugis ng mga tauhan ng Delpan Police Community Precinct ang suspek na si Patrick de la Paz, 25, security guard, ng nabanggit ding lugar.

Ayon sa imbestigasyon ni SPO4 Glenzor Vallejo, ng Manila Police District-Homicide Section, naganap ang insidente dakong 2:30 a.m. sa nabanggit na lugar.

Napag-alaman, habang nakikipag-inoman ang suspek nang dumating ang kanyang misis at siya ay sinusundo na.

Bunsod nito, kinantiyawan ng biktima ang suspek na ‘under’ ng kanyang misis.

Nairita ang suspek, bumunot ng patalim sa kanyang bewang at sinaksak sa leeg ang biktima at pagkaraan ay mabilis na tumakas.