LP candidate sa Antipolo sugatan sa ambush (Sa bisperas ng CoC filing)

NILALAPATAN ng lunas sa ospital ang 44-anyos Liberal Party councilor candidate sa 2016 election, makaraang pagbabarilin ng riding in tandem kamakalawa ng gabi habang patungo sa local party meeting sa Antipolo City.

Kinilala ni Supt. Godfredo Kinhude Tul-O, chief of police, ang biktimang si Macario Semilla y Paraiso, 44, nakatira sa Villa Leyva, Compound, Brgy. Sta. Cruz ng lungsod.

Dakong 6:30 p.m. nang tambangan ang biktima ng mga suspek na sakay ng motorsiklo. Nang maispatan ang tricycle na sinasakyan ng biktima sa Monterosas Executive Subd., J.P. Rizal Ave. sa lungsod ay niratrat ang kandidato sa ulo at katawan.

Naniniwala ang anak ng biktima na si Kenneth na may kaugnayan sa politika ang tangkang pagpatay sa kanyang ama.

Saantala, dalawang lalaki ang inimbitahan ng mga awtoridad para imbestigahan makaraang mamataan sa ospital na kahina-hinala ang kilos.