Poe papayagang maghain ng COC (Ayon sa Comelec)

TATANGGAPIN pa rin ng Commission on Elections (Comelec) ang ihahaing certificate of candidacy (COC) ni Sen. Grace Poe para sa pagtakbo niya bilang pangulo sa 2016.

Ito’y sa kabila nang tumatakbong kaso ng senadora sa Senate Electoral Tribunal (SET) kaugnay ng kanyang citizenship.

Sinabi ni Comelec chairman Andres Bautista, puwedeng maghain ng kandidatura si Poe simula ngayong araw, Oktubre 12.

“Wala naman pong balakid para mag-file siya. Kumbaga, wala pa namang pasya ‘yung Senate Electoral Tribunal,” paglilinaw ni Bautista.

Gayonman, may kinakailangang gawing aksyon sakaling may maghain ng disqualification case laban kay Poe sa Comelec.

Ibig sabihin nito, posibleng magsabay ang disqualification case ng senadora sa Comelec at sa SET.

“Iba ‘yung sa SET eh, ‘yun ay kinukuwestyon ang kanyang qualification bilang senador. Kung maghahain siya ng COC, if ever, ang kukuwestyunin naman ay ‘yung qualifications niya as president,” ani Bautista.