P58-M Vietnam rice nasabat sa CdeO

CAGAYAN DE ORO CITY – Mahaharap sa kaukulang kaso ang may-ari ng P58 milyong halaga ng imported rice na nasabat ng Bureau of Customs (BoC)-District 10 habang karga ng barko na dumaong sa Oro Port ng Brgy. Macabalan sa Lungsod ng Cagayan de Oro kamakalawa.

Ito ay kung mabigo ang SODA Enterprises na nakabase sa Iligan City na makapagpakita ng kaukulang mga dokumento sa gagawing ocular inspection ng Customs at Oro Port police officials sa mga kargamento.

Sinabi ni Customs Intelligence Service Chief Arvin Incenso, apat na alert order ang kanilang natanggap mula sa kanilang tanggapang sentral laban sa barkong mula Vietnam dahil sa hinihinalang ilegal na kargamento.

Ayon kay Incenso, ang pag-hold nila sa Vietnam rice ay upang matiyak na hindi makalulusot at mananagot ang tumatayong may-ari na isang Fe Frogalidad, kung wala talagang sapat na papeles.