Screening vs MERS-CoV hinigpitan — Palasyo

TINIYAK ng Malacañang na puspusan ang pagtatrabaho ng gobyerno sa pangunguna ng Department of Health (DoH), para matiyak na hindi kakalat ang nakamamatay na sakit na Middle East Respiratory Syndrome Corona Virus (MERCoV) sa bansa.

Ito ang sinabi ng Malacañang makaraang mamatay sa RITM ang isang Saudia national na nahawaan ng nasabing sakit.

Sinabi ni Communications Sec. Sonny Coloma, dumaraan sa mahigpit na screening ang mga dumarating sa bansa lalo na ang mga galing sa Middle East countries.

Aniya, puspusan ngayon ang ginagawang contact-tracing ng DoH sa mga nakasalamuha ng Saudia national at sakaling may nakitaan ng sintomas ay agad  isasailalim sa ‘isolation’ at pagsusuri.

Hindi rin aniya humihinto ang gobyerno sa paglalabas ng mga kaukulang impormasyon ukol sa nasabing sakit.